REMATAMOS O TRIMESTRE

Hoxe, para rematar o trimestre, tivemos unha xornada diferente...ese "bichiño" que todas e todos sabemos fixo cambiar moitas das actividades que eran unha tradición no cole nestas datas.

Este ano non houbo chocolatada nin visita do Apalpador por mor da pandemia, pero chegou a súa mensaxe en video.Tamén apareceron as chuches nun saco  que repartiron as nosas profes.

 

As merendas tamén foron "especiais" e típicas desta época: turróns, biscoito, "polvoróns" e moito-moito chocolate. 

 

Seguimos o circuito emocional cos desexos de todo o cole:

 

Foi día de recollida de materiais, xogos na aula e de película. 

De fondo musical, escoitábanse por todo o cole cantigas e panxoliñas.

No patio todas as clases participamos no recreo e na saída cun baile.

Agora toca despedir o trimestre e renovar enerxías para comezar con ilusión o novo ano. 

FELICES FESTAS E PRÓSPERO 2021

DESEXOS PARA O ANO 2021

   Agora tocan uns días de descanso e celebracións, voltaremos coas "pilas cargadas" e os mellores ánimos para as actividades e os proxectos que nos agardan co novo trimestre.

OS MELLORES DESEXOS PARA O ANO 2021!!! 

 

ANIMACIÓN LECTORA e PROPOSTA TEATRAL

Escollimos nas bibliotecas de clase un libro para gozar da súa lectura durante os próximos días de vacacións.

Leremos e "viviremos" moitas historias coa nosa imaxinación.

A volta comentaremos... 

Tamén presentamos unhas propostas para asistir ao teatro desde a casa:

Máis información clicando sobre as imaxes

POSTAL DE NADAL CON CIRCUITO ELÉCTRICO

O mércores 16 e o xoves 17 de decembro recibimos unha nova proposta relacionada co Nadal. Elaboramos unha tarxeta para felicitar estas festas tan especiais, pero tamén aprendemos como funciona un circuito eléctrico, e incluso fixemos un! A explicación púxoa en marcha o profe Andrés xunto coa profe Maite, secretaria do centro, coa colaboración das nosas titoras.

 

Hai  nova entrada no blog ENGLISH 4 5 6 de data Tuesday, 15 December 2020 con vocabulario, actividades, videos e tarefas online sobre "CHRISTMAS TIME".

VISITA AO MUSEO VIRTUAL VILAVERDE

E para rematar a semana un agasallo moi especial...

Esta fin de semana xa podemos visitar as diferentes salas do noso MUSEO VIRTUAL. Hai nove salas adicadas a nove pintoras e pintores da nosa terra cargadas de preciosas obras que admiraremos con boa música.

Buscade con atención onde están colocadas as nosas obras e a quén está adicada a sala.
Parabéns a todas as familias do centro pola súa entusiasta participación!!!👏👏👏

Noraboa á profe Pi pola montaxe conxunta.😉

CIRCUITO EMOCIONAL

Preparamos con moita ilusión unha actividade de centro con todos os desexos das nenas e dos nenos para o ano 2021.

Escribimos e ilustramos un desexo por alumna ou alumno.

Este ano o tema estrela ten que ver coa saúde... 😷😷😷

Con todos os desexos do cole preparamos unha sorpresa 😊😉...pero temos que esperar uns días.

TARXETAS DE NADAL 2020

Un ano máis preparamos o noso traballo relacionado coas tarxetas de Nadal.

Visonamos unha presentación sobre TARXETAS e fomos comentando as diferentes diapositivas.

Este ano, a nosa inspiración "artística" recae na pintora galega TERESA IRISARRI. Investigamos sobre ela e sobre a súa obra...

Agora tratamos de facer as nosas composicións tan vistosas e coloristas como as da artista de referencia.

Usamos ceras, pinturas e rotuladores...

SOBRE DEREITOS...E DEBERES

Nas clases traballamos arredor do seguinte video:

Tamén estamos lendo e ilustrando a historia O NENO DOS ÓSOS DE DÁTIL.

E preparamos o aniversario da nosa CONSTITUCIÓN:

VIVA A CONSTITUCIÓN!

Aprendemos os dereitos e deberes que temos como cidadáns e cidadás con esta canción adicada a nosa Constitución que, en pouquiños días, estará de aniversario. Parabéns Constitución!

CHARLA SOBRE ALIMENTACIÓN SAUDABLE

Este xoves recibimos unha charla sobre alimentación saudable. O responsable de organizala foi a Sociedade Deportiva Teucro. A monitora da actividade incidiu na importancia de ter un equilibrio na nosa dieta, evitando tomar a diario os produtos que están na cume da pirámide alimenticia. Ao remate da charla agasalláronnos cunha bolsiña de tea que contiña produtos moi recomendables para unha vida saudable.

PRÁCTICAS NA AULA VIRTUAL

Sobre o reloxo do blog temos o acceso a nosa AULA VIRTUAL de 4º.

Tamén podemos acceder desde o blog do cole e desde a páxina web do centro.

Entramos co noso NOME e co noso CONTRASINAL individual e confidencial.

Esta semana temos dúas pequenas propostas para comezar a manexar esta nova ferramenta.

Animádevos para que amodiño poidamos ir mellorando a nosa competencia dixital. 😉

Hai  nova entrada no blog ENGLISH 4 5 6 de data Monday, 30 November 2020 con vocabulario, actividades, videos e tarefas online sobre "FIVE SENSES".

TITORIAL DE AXUDA PARA AULA VIRTUAL E VIDEOCONFERENCIA

Pasiño a paso, imos poñer en marcha a nosa aula virtual como un recurso máis que nos axudará na nosa actividade escolar e tamén para desenvolver a competencia dixital.

Na clase explicaremos como comezar nesta nova andaina. Ás familias darémoslles indicacións proximamente e mandaremos o nome de usuaria ou de usuario e as instrucións para poñer o contrasinal e acceder.

O próximo martes, día 1 de decembro pola tarde, teremos un encontro por videoconferencia para comprobar as posibilidades de conectividade do noso alumnado. Os requisitos para poder conectarse mandarémosllos a cada familia. 

Este titorial pode axudarnos:

AS UNLLAS DE CORES. Reto final de semana

 

 

OS NOSOS BODEGÓNS

Preciosas composicións!😊😉

Noraboa pola vosa participación!!! 👏👏👏 

E velaquí a nosa versión en video con música:

BODEGÓNS DE 4º - Outubro 2020

REPARTO DAS TAREFAS. Reto do día

E seguindo coas temáticas da semana, hoxe o noso reto é unha palabra comentada e traballada estes días. Para resolvelo fixemos o reto co xogo do "aforcado":

Lembrade que no noso blog, situado a esquerda e debaixo do repaso de problemas, temos BUSCA PALABRAS con interesantes propostas: busca sinónimos, antónimos, rimas, crea encrucillados, sopa de letras e o xogo do "aforcadiño".

ANTÓNIMOS E SINÓNIMOS. Reto 25 N

O noso reto de hoxe viña cargado de letras para buscar SINÓNIMOS e ANTÓNIMOS da palabra violencia.

Sopa de letras coa que traballamos hoxe nas nosas aulas:

Anotamos, comentamos significados, separamos sílabas e marcamos a sílaba tónica.

Agora deixamos unhas propostas interactivas con sinónimos, antónimos e palabras polisémicas:

Sinónimos e antónimos 1 

Sinónimos e antónimos 2

Pasapalabras de sinónimos e antónimos  3

Palabras polisémicas 1

Palabras polisémicas 2

Animádevos a practicar e lembrade mandar as vosas respostas ao noso correo electrónico pequesvila@gmail.com
 

O reto de hoxe foi un SUDOKU...pero un sudoku especial:

Colaborou toda a clase para resolverlo no tempo das merendas. Agora tamén o compartimos coas nosas familias.😉

PALABRAS e máis PALABRAS

E no día da palabra...FAMILIAS DE PALABRAS.

Velaquí unhas actividades interactivas para practicar:

Familia palabras 1 con video explicativo.

Familia palabras 2 -arrastrar palabras para formar familias-.

Familia palabras 3 -seleccionar palabras e poñer a palabra primitiva-. 

Animádevos e podedes enviar as respostas ao noso correo pequesvila@gmail.com

23 de novembro: DÍA DA PALABRA

Hoxe, 23 de novembro, conmemórase o DÍA INTERNACIONAL DA PALABRA. Comentamos a necesidade de falar, de entenderse, de consensuar, de dialogar  para eliminar toda violencia.

Esta celebración queda en medio de outras dúas datas importantes: 20 de novembro -DÍA INTERNACIONAL DOS DEREITOS DA INFANCIA- e 25 de novembro -DÍA CONTRA O MALTRATO DE XÉNERO-. 

 

Seguimos insistindo na necesidade de RESPECTO, de DEREITOS e de DEBERES.

As tres datas son motivo de reflexión nas nosas aulas.

Comezamos cunha carta de LAMPI.

Traballamos cunha presentación sobre AS PALABRAS.

 

Tamén chegou un novo reto que completaremos en gran grupo:

MÁIS DOS SENTIDOS

Comezamos recordando as TRES FUNCIÓNS VITAIS*** e afondando na función de relación (entrada de hai uns días).

Recollemos información e traballamos cada sentido:

1.- SENTIDO DA VISTA

 

Vocabulario:

Pálpebras, cellas, pestanas e glándula lacrimal.

Córnea, iris, pupila, retina, cristalino e nervio óptico.

ARTE EN OUTONO

Esta semana no cole estamos investigamos arredor dos BODEGÓNS, tamén coñecidos como NATUREZA MORTA. 

Comentamos exemplos do máis variado e de  artistas galegas e galegos.

Agora compartimos a información coas familias e propoñemos unha actividade de colaboración familiar: realizar unha composición de "natureza morta" ou bodegón outonal que será fotografado e remitido ao noso correo-e pequesvila@gmail.com  para montar unha exposición virtual do cole.

Trucos para realizar un bodegón fotografado. 

Prazo de entrega: ata o mércores 25.

E rematamos a semana tratando de averiguar un CÓDIGO SECRETO. Dádelle algunha voltiña e o luns comentamos. 😀😉

 

E hoxe o reto foi un xogo matemático...pensa, pensa...que valor pode ter un ourizo, unha castaña e unha folla para que os resultados das operacións coincidan. Ademais hai que averiguar o último resultado. ÁNIMO!!!

RECEITAS CON CASTAÑAS

Tempo de magosto, tempo de castañas...o venres será un MAGOSTO diferente. 

As merendas propostas para o venres consistirán en froita desta época, doces elaborados con produtos desta tempada ( castañas asadas, castañas cocidas, biscoito de noz, biscoito de mazá ou de cabaza...)

-----------------------------------------------------------------------------------

Nas clases traballaremos dous textos de receitas con castañas, unha en galego e outra en castelán. Esperamos que algunha familia, ademais de lelas, tamén se anime a cociñar.😋😋😋

Receita LG de BISCOITO DE CASTAÑAS. 

Receita LC de MAGDALENAS DE CASTAÑAS. (O MOUSSE DE CASTAÑAS?)

-----------------------------------------------------------------------------------

Chegan imaxes da elaboración dalgunhas das merendas do noso magosto. Preme no enlace do noso escaparate creativo:

AS NOSAS MERENDAS ESPECIAIS 

Hai  nova entrada no blog ENGLISH 4 5 6 de data Wednesday, 11 November 2020 con vocabulario, actividades, videos e tarefas online sobre "DESCRIBING PEOPLE".

Compartimos o reto que chegou hoxe as nosas clases. Encántanos os sudokus, temos unha entrada a esquerda do blog e practicamos con diferentes niveis de dificultade.

Outra proposta de SUDOKUS ONLINE