COÑECENDO A MIRÓ

No mes de decembro abordamos un proxecto artístico que ten como protagonista a figura de JOAN MIRÓ.

Venres, 28 de novembro

Na clase limos con interese unha pequena historia sobre a vida deste artista.

Na última sesión do venres, na biblioteca celebramos un pequeno obradoiro artístico da man de Mónica Bayo,  nai de Antón e Vera de 5 anos. Aprendimos un pouquiño máis da súa vida, do seu arte, das súas afeccións, dos seus intereses, dos elementos que marcan a súa obra, das súas viaxes...

Para rematar a sesión realizamos entre todas e todos unha obra imitando a Miró. Empregamos recortes repartidos a todo o alumnado e fómolos "sementando" sobre un fondo o azul, despois "regamos" para que a obra "medrara". 

O resultado sorprendeunos e agora podemos "presumir" de obra no noso corredor de 3º.

Moitas grazas Mónica pola sesión. 

Xa estamos preparadas e preparados para facer as nosas obras seguindo o estilo de Joan Miró.

A partir do luns seguide atentas e atentos aos nosos progresos artísticos. Daremos noticias...

PALABRAS PERCUDITAS

Hoxe asistimos no Museo de Pontevedra a unha sesión de contacontos a ritmo de percusión.

"Palabras percuDitas" é un espectáculo que combina a música percutida a cargo de Javier Fernández coa narración de historias a cargo de Charo Pita. 

Asistimos con moito interese e curiosidade a este concerto didáctico onde apareceron diferentes instrumentos de percusión (djembé, bombo legüero, xilófano de barro, udu, tambores de garabato) que lle daban forza e ritmo ás historias de fábulas narradas de maneira maxistral pola contacontos Charo Pita. Houbo moitos aplausos...e xa lle pedimos a profe Lola tocar máis percusión 😉

Preme para ver máis imaxes

FUNCIÓNS VITAIS

A quén afectan os cambios dos que estamos a falar desde que comezou o noso proxecto?
A resposta foi unánime:  OS SERES VIVOS
Iniciamos un novo percorrido:

SERES VIVOS. Recollemos ideas previas. Recabamos información. Visionamos o curto de Camaleón. Organizamos a información en esquemas, definimos, clasificamos, buscamos exemplos...

25 de NOVEMBRO - CONTRA O MALTRATO DE XÉNERO

 
EN  NEGRO  CONTRA  AS  VIOLENCIAS

Hoxe o cole está cheo de carteis que reivindican espazos sen violencia.

Na clase comentamos o significado desta campaña. Limos a carta que chegou do Galo Vilaverdiño para facer notar a loita contra o maltrato de xénero.
Queremos que esté presente todos os días, pero durante esta semana traballámolo de maneira especial.

Visualizamos a nosa repulsa levando unhas pegatinas reivindicativas.

Loitando na mesma dirección, no mesmo sentido, tamén podemos axudar.

No corredor das aulas de 1º e 2º admiramos o mural que fixo a titoría de 2ºB sobre a obra modernista de Gustav Klimt "O bico / El beso" e limos a cartelería que o acompaña. Aproveitamos para facer posados por equipos:

 APERTAS CONTRA A VIOLENCIA

DÍA DA PALABRA

Venres, 22 de novembro
O 23 de novembro, conmemórase o DÍA INTERNACIONAL DA PALABRA. Visonamos un PPT sobre os moitísimos tipos de palabras que temos nos nosos idiomas. Comentamos a necesidade de falar, de entenderse, de consensuar, de dialogar, de empregar a palabra como ferramenta para eliminar toda violencia.

Esta celebración queda en medio de outras dúas datas importantes: 20 de novembro -DÍA INTENACIONAL DOS DEREITOS DA INFANCIA- e 25 de novembro -DÍA CONTRA O MALTRATO DE XÉNERO-. Asi que seguimos insistindo na necesidade de RESPECTO, de DEREITOS e de DEBERES.

E a proposta de Lampi, que nos remitiu unha carta nun simpático sobre, traballamos en equipo a busca dunha palabra graciosa, simpática, con humor que se empregará para facer un mural conxunto no cole.

O luns seguiremos coa actividade...

Luns, 25 de novembro
Hoxe, tal como adiantamos o venres, comentamos e propuxemos diferentes palabras que nos soan especialmente graciosas, humorísticas ou que nos fan sorrir.
A actividade fíxonos reflexionar sobre o uso de palabras malsoantes ou groseiras e  palabras  irrespectuosas. Desta maneira, escolmamos as palabras finalistas que votamos entre toda a clase.
No grupo de 3º A, esta foi a palabra finalista:

Martes, 26 de novembro
No grupo de 3º B, esta foi a palabra finalista:

A votación requería unha maioría...eso levounos a votar máis dunha vez. Reflexionamos tamén que non sempre se gaña, pero acatamos a decisión do grupo con deportividade 😉
A tarefa dou moito xogo. Houbo busca na RAG dos termos descoñecidos e organizamos alfabeticamente as vinte palabras que consensuamos como finalistas.

20 N - DEREITOS DA INFANCIA

Hoxe 20 de NOVEMBRO celébrase o DÍA INTERNACIONAL DOS DEREITOS DA INFANCIA.

Nas nosas clases traballamos arredor desta celebración.
Limos e comentamos os dereitos e os deberes e asociamos fotos e imaxes con textos.
Traballamos a preciosa historia "EL ECO DE MI NOMBRE" de Elena Presas sobre o dereito a ter un nome, unha identidade.
Tamén presentamos o libro "YO SERÉ TRES MIL MILLONES DE NIÑOS" de Alain Serres que nos sensibilizou sobre a infancia menos afortunada.

Traballamos a letra da canción adicada aos dereitos das nenas e dos nenos no mundo cos personaxes de Luna Lunera:

Enlace ao curto: ¿Dónde están mis derechos humanos?

PUNTOS CARDINAIS. O COMPÁS

Falamos dos puntos cardinais como as catro direccións derivadas do movemento de rotación terrestre que permiten a orientación nun mapa ou na propia superficie terrestre.

Comentamos en que consiste o compás, agulla de marear ou "búsula" (en castelán brújula).
Fixemos prácticas do seu uso por equipos:
Realizamos actividades para facer percorridos seguindo instrucións cos puntos cardinais

MÁIS DO CICLO DA AUGA

EVAPORACIÓN - CONDENSACIÓN - PRECIPITACIÓN - RECOLLIDA

Un novo video que repasa o que estudiamos sobre o ciclo da auga e que atopamos na páxina da AXENCIA ESPACIAL EUROPEA (ESA - Space por Kids)

DIXESTIÓN DA CASTAÑA

Hoxe limos un texto sobre o percorrido que faría unha castaña polo noso aparato dixestivo. Despois esquematizamos o contido en 4 pasos.
Na clase vimos e comentamos o seguinte curto:

Sorprendeunos moito o longo que é o intestino delgado...ata empregamos o metro e comprobamos canto mediría "estirado".😲
E rematamos con ritmo o percorrido polo aparato dixestivo. Houbo máis dun sorriso.😀

Agora queremos saber máis do funcionamento do noso corpo. 😊

NOTICIA DO DÍA: ELECCIÓNS 10N

Onte celebraronse eleccións xerais para elexir representantes para Congreso e o Senado do noso país. Hoxe foi motivo de charla e comentario nas nosas clases.

Vocabulario: urna, censo, voto, papeleta, sobres branco e sepia, electoras-electores, representantes, Congreso (deputadas e deputados), Senado (senadoras e senadores), mesa electoral, maioría, partidos, campaña electoral, propaganda electoral, mitín, hemiciclo, voto en branco, voto nulo, coalición...

Os datos aparecidos na prensa escrita e dixital sobre os resultados serviron tamén para comentar como son as gráficas que recollen os resultados. Nós tamén interpretamos matemáticamente eses resultados...e propuxemos posibles acordos ou coalicións.

Recordamos a historia do calcetín político e como remataba o capítulo. Xenial!!!

MAGOSTO 2019

Traballamos o Samaín e o Magosto desde moitos e variados aspectos. Hoxe mesmo rematamos o noso esquema de hexágonos sobre o texto "A ASAR CASTAÑAS" e démoslle os últimos retoques aos nosos amuletos para a exposición solicitada por Antío.

Aportamos castañas xa amosegadas que deixamos na zona da entrada do cole. Paco encargouse da fogueira e tivo axuda do alumnado de 6º.

Despois do recreo, comezou a celebración festiva co baile de Uxía Lambona e a Banda Molona - O Samaín.  Levamos unha tarxeta identificativa co personaxe que interpretamos na canción. 

Velaquí algunhas das imaxes:

Despois as nenas e os nenos de 6º repartiron as castañas asadas. Os grupos estabamos organizados en rodas e nós tiñamos os cucuruchos preparados...que fame!!! Ata fixemos tempo mirando as noticias nos periódicos e atopamos varios mapas metereolóxicos...

Rematamos cun obradoiro de maquillaxe a cargo dalgún alumnado voluntario de 6º e dalgunhas profes que foron deseñando motivos do máis variado.

E rematamos coa recollida e limpeza do patio. Agora a esperar que a seguinte celebración sexa tan divertida como esta xornada.

Preme sobre as imaxes para ver máis fotos.

SAMAÍN 2019

Nestas datas traballamos arredor do SAMAÍN.

Fixemos buscas no dicionario.

Limos historias relacionadas con esta celebración.

Traballamos os medos e con historias de medo.

Organizamos a información sobre o Samaín en esquemas 5x5.

Na biblioteca de Lampi participamos en diferentes obradoiros de tarxetas do Samaín ou de apócemas máxicas.
Fixemos algunha actividade robótica...

Tamén  elaboramos amuletos para protexernos de moitos "males" ou darnos "sorte" de maneiras diferentes. Empregamos unha pasta moi parecida ao barro, modelamos e deseñamos diferentes talismáns ou amuletos que moi pronto estarán expostos nos corredores do centro.
Despois da exposición, poderemos levalos para casa...

QUE SERÁN?

Observa atentamente as imaxes seguintes.
Serán mapas físicos? Serán mapas políticos?
De onde son estes mapas?
Para que servirán?
Que indican as lendas?

Ide pensando!
Mañán comentamos...

LOCALIZACIÓN E LÍMITES DE ESPAÑA

Traballamos cos mapas de España. Manexamos mapas físicos, políticos e temáticos.

Localizamos e describimos os límites de España no mapa. Este video axúdanos a recordar o traballado na clase:

GAIA

Hoxe tivemos a nosa primeira saída de terceiro para asistir á representación de GAIA na sede Afundación de Pontevedra. Tiñamos moita ilusión...

Gaia é un espectáculo con voz e danza sobre o medio ambiente. Emprega a danza, a pintura e a música con efectos audiovisuais para axudarnos a valorar a beleza do noso planeta, as súas riquezas naturais e a interacción das persoas e a natureza.

A obra parecía especialmente feita para nós porque nela apareceron informacións de plena actualidade nas nosas clases:

. Cambio climático
. Terra e representación
. Atmosfera, ozono, clima
. Contaminación
. Ciclo da auga
. Código RRR: reducir, reciclar, reutilizar

. Seres vivos e coidados. Animais e plantas

Houbo música, acrobacias, baile...e reflexión sobre o coidado do medio ambiente e a nosa implicación coa clave RRR. 

Resultou moi entretida. Valorámola e comentámola na clase con interese.

PROXECTO AQUALOXÍA - CICLO DA AUGA

Hoxe recibimos unha visita moi especial, a Dra. "Solete" achegounos información sobre a auga. Repasamos O CICLO NATURAL DA AUGA para traballar despois sobre os usos que se fan con ela,  como chega  ás nosas casas, os tratamentos que son necesarios para poder bebela ou para devolvela ao medio natural e como aforrala.

Na  pantalla seguimos a historia do ciclo urbano da auga cos personaxes de Aqualoxía. Tamén fixemos uns pequenos experimentos. Agora estamos "comprometidas" e "comprometidos" coa importancia da auga e o medio ambiente e recibimos un DIPLOMA acreditativo.

Preme para ver máis imaxes

Esta actividade foi posible coa colaboración de Viaqua e o concello de Pontevedra.

Na clase reflexionamos sobre o traballado neste obradoiro e afondamos na explicación do ciclo da auga. Aproveitamos para visionar uns curtos que compartimos coas familias.

A auga existe na Terra en tres estados: sólido (xeo, neve), líquido e gasoso (vapor de auga). Océanos, ríos, nubes e chuvia están en constante cambio: a auga na superficie evapórase, a agua nas nubes precipita, a chuvia fíltrase na terra, et. A circulación e conservación da auga na Terra chámase ciclo hidrolóxico ou ciclo da auga. Cando se formou, hai aproximadamente catro mil quinientos millóns de anos, a Terra xa tiña no seu interior vapor de auga.

Suxerencias lectoras arredor do tema da auga, os estados da auga e o ciclo da auga: 

  

A primeira historia  foi lida e comentada na clase.

A segunda é unha proposta para ler na casa "clicando" sobre a imaxe.